၂၀၁၈၊ စက်တင်ဘာ ၅ ရက်နေ့ထုတ် ကြေးမုံသတင်းစာမှာ ပါရှိတဲ့ ကျန်းမာရေးနဲ့ အားကစားဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာနရဲ့ သတင်းထုတ်ပြန်ချက်ကို တွေ့ရစဉ်။ Photo: http://www.moi.gov.mm/npe/km/
သွားလာရေးခက်ခဲတဲ့ ကိုယ်ပိုင်အုပ်ချုပ်ခွင့်ရဒေသ ၆ ခုက ၁၀ တန်းအောင်မြင်သူတွေအနေနဲ့ ဆေးတက္ကသိုလ်တွေ ကို အမှတ်ကန့်သတ်ချက်မရှိဘဲ လျှောက်ထားနိုင်ပြီလို့ ကျန်းမာရေးနဲ့ အားကစားဝန်ကြီးဌာနက သတင်း ထုတ်ပြန်ပါတယ်။

၂၀၁၈ ခုနှစ် ပညာသင်နှစ်မှာ နာဂ၊ ဓနု၊ ပအိုဝ်း၊ ပလောင်၊ ကိုးကန့် နဲ့ ၀ စတဲ့ဒေသ ၆ ခုက တက္ကသိုလ်ဝင်တန်း အောင်မြင်သူတွေကို အခုလို စာမေးပွဲရမှတ် ကန့်သတ်မထားဘဲ ဆေးတက္ကသိုလ်ဝင်ခွင့် လျှောက်ထားနိုင်ကြောင်း ကျန်းမာရေးနှင့် အားကစားဝန်ကြီးဌာနက ဒီနေ့ထုတ် အစိုးရသတင်းစာတွေမှာ ရေးသားဖော်ပြထားပါတယ်။

ဓနု၊ ပအိုဝ်း၊ ပလောင်၊ ကိုးကန့် နဲ့ ၀ ကိုယ်ပိုင်အုပ်ချုပ်ခွင့်ရဒေသ ၅ ခုရှိတဲ့ ရှမ်းပြည်နယ်က တောင်ကြီး ဆေးတက္ကသိုလ်မှာ မနှစ်က အဲလိုဝင်ခွင့်လျှောက်ပြီး တက်ရောက်နေသူတွေရှိကြောင်း ရှမ်းပြည်နယ်အစိုးရအဖွဲ့ လူမှုရေးဝန်ကြီး ဒေါက်တာ မျိုးထွန်း က ပြောပါတယ်။

"တောင်ကြီးဆေးတက္ကသိုလ်မှာ တက်နေတဲ့ဟာတော့ရှိတယ်၊ မနှစ်ကဆို ပအိုဝ်း ကိုယ်ပိုင်အုပ်ချုပ်ခွင့်ရဒေသက ဘယ်နှစ်ယောက်၊ ဓနု ကိုယ်ပိုင်အုပ်ချုပ်ခွင့်ရဒေသက ဘယ်နှစ်ယောက်ဆိုတာ ရှိတယ်လေ၊ ဒါပေမဲ့ တကယ့်တကယ် အထူးအခွင့်အရေးပေးတာက ပြည်ထောင်စုဝန်ကြီးရုံးက ပေးတာလေ၊ ပြည်နယ်အစိုးရက ပေးတာတော့ မရှိဘူးပေါ့နော်"

ကျန်းမာရေးလူ့စွမ်းအားအရင်းအမြစ်ဦးစီးဌာနရဲ့ အဆိုအရ အဲဒီအခွင့်အရေးကို ၂၀၁၂ ခုနှစ်ကစပြီး ပေးခဲ့တာ ဖြစ်တယ်လို့ သိရပါတယ်။

မနှစ်တုန်းက နာဂ ကိုယ်ပိုင်အုပ်ချုပ်ခွင့်ရဒေသတွေဖြစ်တဲ့ လေရှီးနဲ့ နန်းယွန်းမြို့နယ်တွေက ကျောင်းသား ၃ ယောက် နဲ့ ကျောင်းသူ ၁ ယောက် စုစုပေါင်း ၄ ယောက် ဆေးတက္ကသိုလ် တက်ရောက်ခွင့်ရခဲ့တယ်လို့လည်း သိရပါတယ်။

ဒီနှစ်အတွက် လျှောက်ထားမယ့်သူတွေဟာ ၈ တန်း၊ ၉ တန်း နဲ့ ၁၀ တန်းကို အဲဒီကိုယ်ပိုင်အုပ်ချုပ်ခွင့်ရဒေသတွေမှာ ဆက်တိုက်ပညာသင်ကြားခဲ့ပြီး အဲဒီဒေသတွေရဲ့ စာစစ်ဌာနတွေကနေ ၂၀၁၈ တက္ကသိုလ်ဝင်စာမေးပွဲ အောင်မြင်သူ ဖြစ်ရမှာ ဖြစ်ပါတယ်။

ဒါ့အပြင် အထူးအခွင့်အရေးအနေနဲ့ ဆေးတက္ကသိုလ် တက်ရောက်ခွင့်ရသူတွေဟာ ဘွဲ့ရပြီးတဲ့အခါ အဲဒီ ဒေသတွေမှာ အနည်းဆုံး ၅ နှစ် မပျက်မကွက် တာဝန်ထမ်းဆောင်ရမှာ ဖြစ်တယ်လို့လည်း သိရပါတယ်။

လျှောက်လွှာတွေကို ဒီစက်တင်ဘာလ ၂၈ ရက်နေ့ နောက်ဆုံးထားပြီး ကျန်းမာရေး လူ့စွမ်းအားအရင်းအမြစ် ဦးစီးဌာန၊ ကျန်းမာရေးနဲ့ အားကစားဝန်ကြီးဌာနကို လျှောက်ထားကြရမှာ ဖြစ်ပါတယ်။

RFA Burmese
https://www.rfa.org/burmese