ဟနွိုင်းမှ အဆောက်အအုံတစ်လုံးကို ဒေါ်လာသန်း ၈၀၀ ဖြင့် ရောင်းချရေးအတွက် အရှေ့အလယ်ပိုင်းမှ အရာရှိတစ်ဦးကို လာဘ်ထိုးရန် ကြိုးပမ်းမှုဖြင့် ကုလသမဂ္ဂ အတွင်းရေးမှူးချုပ်ဟောင်း ဘန်ကီမွန်၏ ဆွေမျိုးနှစ်ဦးကို အမေရိကန် အစိုးရရှေ့နေများက စွဲချက်တင်ခဲ့ကြောင်း သိရသည်။

မန်ဟက်တန် အိမ်ခြံမြေပွဲစားတစ်ဦးဖြစ်ပြီး ဒင်းနစ်ဟုသိကြသည့် ဂျိုးဟန်ဘန်းနှင့် ၎င်း၏ဖခင်ဖြစ်သူ တောင်ကိုရီးယား ဆောက်လုပ်ရေး ကုမ္ပဏီတစ်ခုမှ အကြီးတန်းအမှုဆောင် အရာရှိဖြစ်သူ ဘန်ကီဆန်တို့အပေါ် စွဲချက်တင်ထားသည့် ၃၉ မျက်နှာပါ စွဲဆိုချက်အား ဇန်န၀ါရီ ၁၀ ရက်က ထုတ်ပြန်ခဲ့ခြင်းဖြစ်သည်။ ဘန်ကီဆန်သည် ကုလသမဂ္ဂ အတွင်းရေးမှူးချုပ်ဟောင်း ဘန်ကီမွန်နှင့် ညီအစ်ကိုတော်သူဖြစ်ပြီး ဒင်းနစ်မှာ ဘန်ကီမွန်၏တူဖြစ်သည်။

အမေရိကန်ရှေ့နေများ၏ စွပ်စွဲချက်ထဲ၌ ထိုလာဘ်ထိုးရန် ကြံစည်သည့်ဖြစ်စဉ်သည် ၂၀၁၃ မတ်လမှ ၂၀၁၅ မေလအတွင်း ဖြစ်ပွားခဲ့ခြင်းဖြစ်သည်ဟု ဖော်ပြခဲ့သည်။ ယင်းအမှုသည် ဘန်ကီဆန် အလုပ်လုပ်နေသော တောင်ကိုရီးယား ဆောက်လုပ်ရေးကုမ္ပဏီ Keangnam Enterprises ကဆောက်လုပ်ခဲ့ပြီး ပိုင်ဆိုင်သော ဗီယက်နမ်နိုင်ငံ ဟနွိုင်းမြို့ရှိ စီးပွားရေးနှင့် လူနေထိုင်ရန် တိုက်ခန်းများ ပါဝင်သည့် အဆောက်အအုံအား ရောင်းချရန် ကြိုးပမ်းမှုနှင့် ဆက်နွှယ်နေသည်။ ဘန်တို့သားအဖနှစ်ဦးသည် အမည်မဖော်လိုသော အရှေ့အလယ်ပိုင်း နိုင်ငံတစ်နိုင်ငံမှ အစိုးရအရာရှိတစ်ဦးအား နိုင်ငံပိုင်ရန်ပုံငွေဖြင့် ဟနွိုင်းရှိ အဆောက်အအုံကို ၀ယ်စေရေးအတွက် လာဘ်ထိုးရန် ကြိုးပမ်းခဲ့ကြသည်။

ထိုအရှေ့အလယ်ပိုင်း အရာရှိအား မယ်ကွန်ဟားရစ် အမည်ရသော အမေရိကန် နိုင်ငံသားမှတစ်ဆင့် ဒေါ်လာ ၅၀၀,၀၀၀ လာဘ်ထိုးရန် ကြိုးပမ်းခဲ့ခြင်းဖြစ်သည်။ သို့သော် မယ်ကွန်ဟားရစ်ဆိုသူသည် ထိုလာဘ်ငွေများကို အရှေ့အလယ်ပိုင်း အရာရှိထံပေးရမည့်အစား သုံးဖြုန်းပစ်ခဲ့သည်ဟု စွပ်စွဲခံထားရသဖြင့် ၎င်းသည်လည်း စွဲချက်တင်ခံထားရပြန်သည်။          

အဆိုပါ ဟနွိုင်းအဆောက်အအုံ အရောင်းအ၀ယ်မှာ မဖြစ်မြောက်ခဲ့ဘဲ Keangnam လုပ်ငန်း၏ ငွေပေါ်လွယ်မှု အကျပ်အတည်းမှာလည်း ဆိုးရွားလာခဲ့သည်။ ထို့ကြောင့် နောက်ဆုံးတွင် Keangnam သည် ကုမ္ပဏီကို တောင်ကိုရီးယား တရားရုံး၏ ပစ္စည်းထိန်းလက်ထဲသို့ လွှဲအပ်ခဲ့ရသည်။

ဘန်ကီမွန်၏ ဆွေမျိုးနှစ်ဦးကို ခြစားမှု၊ ငွေကြေးခ၀ါချမှု၊ ပူးပေါင်းကြံစည်မှုတို့ဖြင့် စွဲချက်တင်ထားကြောင်း သိရသည်။ ထိုစွဲချက်များသည် ဘန်ကီမွန်ရာထူးမှ ဆင်းခဲ့သော ဒီဇင်ဘာ ၃၁ ရက်နောက်ပိုင်းမှ ထွက်ပေါ်လာခြင်းဖြစ်သည်။