နယ်စပ် အစွန်အဖျားတွင် နေထိုင်သူဖြစ်စေ၊ ဗဟိုချက်မဒေသများတွင် နေထိုင်သူဖြစ်စေ ပြည်ထောင်စုဖွား တိုင်းရင်းသားများ၏ အသက် အိုးအိမ် စည်းစိမ် မပျက်စီးအောင် ကာကွယ်ရမည့် တာဝန်လည်း နိုင်ငံတော်တွင် အပြည့်အဝ ရှိပါကြောင်း
ယမန်နေ့က ရှမ်းပြည်နယ်မြောက်ပိုင်းဒေသ၊ လားရှိုးမြို့ပေါ်ရှိ ပုဂ္ဂလိကဘဏ်တစ်ခုတွင် အချိန်ကိုက် ဗုံးပေါက်ကွဲမှုကြောင့် လူသေဆုံးမှုနှင့် အများအပြား ထိခိုက်ဒဏ်ရာ ရရှိမှုတို့ဖြစ်ပေါ်ခဲ့သည့် သတင်းကြောင့် လားရှိုးမြို့နေ ပြည်သူများ သာမက မြန်မာနိုင်ငံ တစ်ဝန်းလုံးရှိ ပြည်သူများ အထူးပင် ထိတ်လန့်တုန်လှုပ်သွားခဲ့ကြရပေသည်။ 

ဖေဖော်ဝါရီလ ၂၂ ရက်နေ့ ညနေပိုင်းအထိ မည်သည့် အဖွဲ့အစည်းကမျှ ၎င်းတို့လက်ချက်ဖြစ်ကြောင်း ထုတ်ဖော်ပြောဆိုခြင်း မရှိခဲ့သော်လည်း မြန်မာ့တပ်မတော်၏ စစ်ဘက်ရေးရာ လုံခြုံရေးတပ်ဖွဲ့၏ ကြေညာထားချက်အရ KIA အဖွဲ့နှင့် TNLA အဖွဲ့မှ ဗုံးကျွမ်းကျင်သူများက လူစည်ကားရာ နေရာများတွင် တိုက်ခိုက်မှုများပြုလုပ်ရန် စီစဉ်လျက်ရှိသည်ဟု သိရပါသည်။ ထို့ပြင် ယခုဗုံးဖောက်ခွဲ တိုက်ခိုက်မှု ဖြစ်ပွားသည့် လားရှိုးမြို့သည် မကြာခဏ ဆိုသလို တရားဥပဒေ ကင်းမဲ့သည့်ဒေသသဖွယ်ဖြစ်သွားလေ့ရှိပြီး မြန်မာ့တပ်မတော်နှင့် ဆယ်စုနှစ်များစွာ စစ်မက်ပဋိပက္ခ ဖြစ်ပွားခဲ့သော ကေအိုင်အေ၊ တအာင်းနှင့် “ဝ”လက်နက်ကိုင်အုပ်စုများ ခြေရာချင်းထပ်နေသည့် နယ်မြေဒေသထဲတွင် ပါဝင်နေပေသည်။ 

ယခုဖောက်ခွဲမှုကို မည်သည့်လက်နက်ကိုင် အဖွဲ့အစည်းက အကွက်ချစီစဉ်ခဲ့သည်ဖြစ်စေ၊ ဗုံးထောင်သွားသူမှာ မည်သူမည်ဝါ ဖြစ်သည်ဖြစ်စေ လားရှိုးနှင့် မူဆယ်မြို့သာမက ရှမ်းပြည် မြောက်ပိုင်းဒေသမှ မြို့ကြီးများ၏ လုံခြုံရေးမှာ စိုးရိမ်စရာ အဆင့်သို့ ရောက်ရှိနေပြီဟု ဆိုရမည်သာဖြစ်သည်။ ထို့ပြင် ဒေါ်အောင်ဆန်းစုကြည်၏ အစိုးရအဖွဲ့က ဦးဆောင် အကောင်အထည်ဖော်နေသည့် တစ်နိုင်ငံလုံး အပစ်အခတ် ရပ်စဲရေး သဘောတူညီချက် စာချုပ်ကိစ္စ အတော်ပင် အရှိန်ရရုံမက ခရီးပေါက်လာသည့် အနေအထားတွင် ယခုလို ဗုံးခွဲတိုက်ခိုက်ခြင်းသည် ငြိမ်းချမ်းရေးလုပ်ငန်းစဉ်ကို ကန့်လန့်တိုက်လိုသူများ ရှိနေသည့်အချက်ကို ဖော်ကျူးလိုက်ခြင်းပင် ဖြစ်ပေသည်။ 

နိုင်ငံတကာနှင့် မြန်မာ့အရေး လေ့လာစောင့်ကြည့်သူ အသိုင်းအဝိုင်းများက မြန်မာပြည် မြောက်ဖျားပိုင်းနှင့် ရှမ်းပြည်မြောက်ပိုင်းမှ စစ်မက်ပဋိပက္ခများကို တိုင်းရင်းသား လူမျိုးများနှင့် ဗဟိုအစိုးရအကြား သယံဇာတ ခွဲဝေမှုပြဿနာ၏ ပင်မ အစိတ်အပိုင်း တစ်ခုအဖြစ် ယေဘုယျ ဝေဖန်ထောက်ပြလေ့ ရှိသည်ကို စာဖတ်သူများ သတိပြုမိပါလိမ့်မည်။ ယခု လားရှိုးဗုံးပေါက်ကွဲမှုအပြီး ထွက်ပေါ်လာသော သတင်းများအရ ပေါက်ကွဲမှုဖြစ်ပွားခဲ့သော ဘဏ်အပါအဝင် အခြားစီးပွားရေး လုပ်ငန်းအများစုသည် နိုင်ငံတော်အစိုးရကို အခွန်ငွေ ပေးဆောင်ကြရသလို တစ်ဖက်တွင်လည်း ငြိမ်းချမ်းရေးဖြစ်စဉ်ကို မလိုလားသည့် တိုင်းရင်းသား လက်နက်ကိုင် အုပ်စုများကို ဆက်ကြေး ပုံမှန်ပေးနေကြရသည်ဟု ကြားသိရသည်မှာလည်း အထူးပင် ဝမ်းနည်းဖွယ်ကောင်းပေသည်။ 

အမှန်တွင် သယံဇာတကိစ္စ တစ်ခုတည်းသာမက တရားသည်ဖြစ်စေ၊ မတရားသည်ဖြစ်စေ ရနိုင်သည့် အခွင့်အရေးမှန်သမျှ၊ ရထားသည့် အခွင့်အရေးမှန်သမျှ လက်မလွှတ်စတမ်း ဖမ်းဆုပ်ထားလိုသူများပြုသမျှ (ထင်တိုင်းကြဲသမျှ)နုကြရသည့် အပြစ်မဲ့ တိုင်းရင်းသား ပြည်သူများသာ ကြီးမားသည့် ဒုက္ခနှင့်ကြုံတွေ့နေကြရခြင်း ပင်ဖြစ်ပေသည်။ မိမိတိုင်းရင်းသားလူမျိုးများနှင့် ၎င်းတို့နေထိုင်ရာ နယ်မြေအတွက် တိုက်ပွဲဝင်နေပါသည်ဟု မည်သို့ပင်ကြွေးကြော်နေစေကာမူ အပြစ်မဲ့သူများသေကျေ ပျက်စီးအောင် လုပ်ဆောင်မှုမျိုးသည် အကြမ်းဖက်သူတို့၏ လမ်းစဉ်သာဖြစ်ပြီး ယင်းသို့သော လမ်းစဉ်ကို ကျင့်သုံးသူ မည်သူ့ကိုမဆို အထူးပင် ကန့်ကွက်ရှုတ်ချပါကြောင်း ပြောလိုပေသည်။ ထို့အတူ နယ်စပ် အစွန်အဖျားတွင် နေထိုင်သူဖြစ်စေ၊ ဗဟိုချက်မဒေသများတွင် နေထိုင်သူဖြစ်စေ ပြည်ထောင်စုဖွား တိုင်းရင်းသားများ၏ အသက် အိုးအိမ် စည်းစိမ် မပျက်စီးအောင် ကာကွယ်ရမည့် တာဝန်လည်း နိုင်ငံတော်တွင် အပြည့်အဝ ရှိပါကြောင်း ဖော်ပြလိုပေသည်။
 
အယ်ဒီတာ (၂၂-၂-၂၀၁၈)