ရန်ကုန်ဈေးကွက်တွင် ရွှေဈေးသည် တစ်ကျပ်သား ကျပ်ဆယ်သိန်းနီးပါး ဈေးပေါက်နေပြီး ဒေါ်လာဈေးမှာ တစ်ဒေါ်လာ ၁,၅၅၀ ကျပ်ကျော်ရောက်ကာ ဈေးကွက်စံချိန်ကို ဆက်ချိုးလျက်ရှိသည်။
ရန်ကုန်၊ ဩဂုတ် ၂၈

ရန်ကုန်ဈေးကွက်တွင် ရွှေဈေးသည် တစ်ကျပ်သား ကျပ်ဆယ်သိန်းနီးပါး ဈေးပေါက်နေပြီး ဒေါ်လာဈေးမှာ တစ်ဒေါ်လာ ၁,၅၅၀ ကျပ်ကျော်ရောက်ကာ ဈေးကွက်စံချိန်ကို ဆက်ချိုးလျက်ရှိသည်။

လက်ရှိ၌ အမေရိကန်ဒေါ်လာဈေးသည် ပြင်ပဈေးကွက်၌ တစ်ဒေါ်လာလျှင် ၁,၅၅၃ ကျပ်၊ ပုဂ္ဂလိကဘဏ်များ၌ တစ်ဒေါ်လာလျှင် ၁,၅၅၃ ကျပ်နှင့် ဗဟိုဘဏ်နှုန်းသည် တစ်ဒေါ်လာလျှင် ၁,၅၀၅ ကျပ် ဈေးရှိကြောင်းငွေကြေးဈေးကွက်အတွင်းမှ သိရသည်။

“လက်ရှိမှာရွှေဈေးက ဒေါ်လာဈေး မြင့်လာတာကြောင့် မနက်ပိုင်းက အခေါက်ရွှေတစ်ကျပ်သားကို ၉၈၄,၅၀၀ ကျပ်အထိ စံချိန်တင်မြင့်တက်လာပါတယ်” ဟု ရန်ကုန်တိုင်းဒေသကြီး ရွှေလုပ်ငန်းရှင်များအသင်း အထွေထွေအတွင်းရေးမှူး ဦးဝင်းမြင့်က ဆိုသည်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် စီးပွားရေးလုပ်ငန်းရှင်များ နေပြည်တော်၌ ဩဂုတ်လ ၂၇ ရက်နေ့က တွေ့ဆုံပြီးနောက် တစ်ဒေါ်လာလျှင် ၁၅ ကျပ်ကျော် မြင့်တက်လာခဲ့ခြင်းဖြစ်သည်။

ယင်းတွေ့ဆုံပွဲ၌ ဒေါ်လာဈေးမြင့်တက် ခြင်းနှင့်ပတ်သက်၍ မည်သည့်အဖြေမျှ ထွက်ပေါ်လာခြင်းမရှိသည့်အတွက်ဖြစ်ကြောင်း လုပ်ငန်းရှင်များက ထောက်ပြကြသည်။

“ဟွန်ဒီမားကက် (တရားမဝင်ငွေ ကြေးဈေးကွက်) က စောင့်ကြည့်နေတာ။ မနေ့ကပွဲက မထူးခြားတော့ ပြန်တက်တာပေါ့” ဟု ဘဏ်လုပ်ငန်းအကြံပေး ဦးသန်းလွင်က ပြောဆိုသည်။

လတ်တလော ဒေါ်လာဈေးမြင့်တက်ရခြင်းသည် ဒေါ်လာတန်ဖိုးမြင့်တက်ခြင်းနှင့် သက်ဆိုင်သော်လည်း ပြည်တွင်းရှိ တရားမဝင်ငွေကြေးဈေးကွက်အတွင်း ငွေဈေးကစားခြင်းများနှင့်လည်း သက်ဆိုင်ပြီး ထိုဈေးကွက်ကြောင့် အခြားငွေကြေးများထက် မြန်မာကျပ်ငွေတန်ဖိုးမှာ ပိုမိုကျဆင်းနေရခြင်းဖြစ်ကြောင်း ဈေးကွက်ကျွမ်းကျင်သူများက ထောက်ပြပြောဆိုသည်။

ရွှေလက်ကားဈေးကွက်အတွင်း၌လည်း အတက်အကျကြမ်းလျက်ရှိသောကြောင့် အရှုံးအမြတ်များပြီး အတုံး (အခေါက်ရွှေ) အရောင်းအဝယ်ဖြစ်နေကြောင်း တိတ်စိန်ရွှေဆိုင်ပိုင်ရှင် ဦးဇော်အောင်က ပြောကြားသည်။ 

ရွှေဈေးမှာ ဩဂုတ်လ ၂၇ ရက်နေ့က အခေါက်ရွှေ တစ်ကျပ်သားလျှင် ၉၆၆,၃၀၀ ကျပ်မှ ဩဂုတ်လ ၂၈ ရက်နေ့၌ အခေါက်ရွှေတစ်ကျပ်သားလျှင် ၉၈၄,၅၀၀ ကျပ်အထိ မြင့်တက်လာခြင်းဖြစ်ကြောင်း ရွှေဈေးကွက်အတွင်းမှ သိရသည်။

S-04၊ J-05