ဗြိတိန်နိုင်ငံမှ စကော့တလန်ပြည် ခွဲထွက်ရေးအတွက် အီဒင်ဘတ်ဂ်မြို့လမ်းမများပေါ်တွင် စကော့တလန်ပြည်သူထောင် ပေါင်းမြောက်မြားစွာ ချီတက်လမ်းလျှောက်ကာ ဆန္ဒထုတ်ဖော်ပြသခဲ့ကြကြောင်း ဗြိတိန် သတင်းဌာနများက ရေးသားဖော်ပြသည်။


လန်ဒန်၊ အောက်တိုဘာ ၇ 

ဗြိတိန်နိုင်ငံမှ စကော့တလန်ပြည် ခွဲထွက်ရေးအတွက် အီဒင်ဘတ်ဂ်မြို့လမ်းမများပေါ်တွင် စကော့တလန်ပြည်သူထောင် ပေါင်းမြောက်မြားစွာ ချီတက်လမ်းလျှောက်ကာ ဆန္ဒထုတ်ဖော်ပြသခဲ့ကြကြောင်း ဗြိတိန် သတင်းဌာနများက ရေးသားဖော်ပြသည်။ 

ဆန္ဒပြသူများသည် အီဒင်ဘတ်ဂ်မြို့ စကော့တလန် ပါလီမန်လွှတ်တော်အဆောက် အအုံအနီးရှိ ပန်းခြံတစ်ခုတွင် ဦးစွာစုရုံးပြီးနောက် အပြာရောင်စကော့တလန်အလံများကို ကိုင်ဆောင်ဝှေ့ယမ်းကာ စတင်ချီတက်ကြခြင်းဖြစ်သည်။ 

လွတ်လပ်ရေးအတွက်ချီတက်ဆန္ဒပြမှုတွင် လိုက်ပါသွားသည့် Reuters သတင်းထောက်၏ခန့်မှန်းချက်အရ စကော့တလန်ပြည်သူ ထောင်ပေါင်းများစွာ ပါဝင်ချီတက်ခဲ့သည်။ သို့သော် ယင်းဆန္ဒပြပွဲကို တန်ပြန်ဆန္ဒပြကန့်ကွက်သည့် အင်အားစုများကလည်း ဗြိတိန်နိုင်ငံအလံများကို ကိုင်ဆောင်ကာ ဆန္ဒပြခဲ့ကြသည်ဟု ၎င်းကဆိုသည်။ 

အားလုံးတစုတစည်းတည်းဟု အမည်ရသည့် ခေါင်းစဉ်ဖြင့် လွတ်လပ်ရေးချီတက်ဆန္ဒပြပွဲကို ဦးဆောင်သူ ဂေရီကယ်လီက ယခုချီတက်ပွဲသို့ စကော့တလန်ပြည်သူ တစ်သိန်းကျော်ခန့် တက်ရောက်ခဲ့သည်ဟု ယုံကြည်ကြောင်း ပြောကြားသည်။

“ဒါဟာ စကော့တလန်ပြည်ရဲ့သမိုင်းကြောင်းမှာ လွတ်လပ်ရေးအတွက် အကြီးမားဆုံးနဲ့ ရဲဝံ့ပြတ်သားမှုအရှိဆုံးချီတက် ဆန္ဒပြမှုကြီးပါပဲ”ဟု ၎င်းက ဆိုသည်။ စကော့တလန်တွင် လူဦးရေ ၅ ဒသမ ၂ သန်းခန့်ရှိသည့်အနက် အီဒင်ဘတ်ဂ်တွင်မူ ၄၈၀၀၀၀ ခန့်ရှိသည်။

စကော့တလန်အမျိုးသားပါတီ (SNP) မှာ ဂလတ်စကော့မြို့တွင် ကွန့်ဖရင့်တစ်ရပ်ကို ကျင်းပလျက်ရှိကြောင်း၊ ယင်းဆွေးနွေးပွဲတွင် လွတ်လပ်ရေးကိစ္စကို ဆွေးနွေးမည်ဟုမျှော်လင့်ရကြောင်း သတင်းများကဆိုသည်။ အဆိုပါ SNP ပါတီသည် အီးယူထဲမှ ဗြိတိန်နုတ်ထွက်သည့်ကိစ္စကို ဆန့်ကျင်ကန့်ကွက်ခဲ့သည်။ 

စကော့တလန်ပြည်သူများသည် ပြီးခဲ့သည့် ၂၀၁၆ ခုနှစ်က အီးယူထဲတွင် ဆက်နေရေး၊ မနေရေးနှင့်ပတ်သက်၍ မဲခွဲဆုံးဖြတ်ခဲ့ကြရာ အများစုက ဆက်နေလိုကြောင်းဖော်ပြခဲ့ကြသည်။ သို့သော်လည်း ဗြိတိန်တစ်နိုင်ငံလုံးအတိုင်းအတာဖြင့်ဆိုပါက အများစုက အီးယူမှ နုတ်ထွက်လိုကြသည်။ ထိုအချိန်မှစ၍ အီးယူမှ ဗြိတိန်နုတ်ထွက်သည့်ကိစ္စ (Brexit) သည် စကော့တလန်ပြည်သူများအား နိုင်ငံခွဲထွက်ကာ လွတ်လပ်ရေးရယူသည်အထိ တွန်းအားပေးလာခဲ့သည်။ 

၂၀၁၄ ခုနှစ်တွင် လွတ်လပ်ရေးအတွက် လူထုဆန္ဒခံယူပွဲတစ်ရပ်ကျင်းပခဲ့ရာ ခွဲထွက်ရေးကိစ္စမှာ မဲ ၁၀ ရာခိုင်နှုန်းအကွာဖြင့် အရေးနိမ့်ခဲ့သည်။ 

လက်ရှိအနေအထားတွင်မူ စကော့တလန်မျိုးချစ်ပုဂ္ဂိုလ်များက လွတ်လပ်ရေးအတွက် ဒုတိယအကြိမ်လူထုဆန္ဒခံယူပွဲတစ်ရပ်  ကျင်းပရန် ဆော်ဩလျက်ရှိသည်။ ယင်းဆန္ဒခံယူပွဲကို ၂၀၂၁ ခုနှစ် Brexit ကိစ္စ အဆုံးသတ်ကာလမတိုင်မီ ကျင်းပပေးရန် ၎င်းတို့က တွန်းအားပေးနေခြင်း ဖြစ်သည်။

ဗြိတိန်နိုင်ငံသည် လာမည့်မတ်လတွင် အီးယူထဲမှ အပြီးနုတ်ထွက်ရန် စီစဉ်ထားပြီဖြစ်သည်။

F-01