မကွေး မကွေးတိုင်းဒေသကြီး မင်းဘူးခရိုင် ပဒါန်းမြို့၌ အများပြည်သူ စုပေါင်းအလှူငွေများဖြင့် သွန်းလုပ်ထားသည့် ဗိုလ်ချုပ်ကြေးရုပ်ကို ပဒါန်းမြို့လယ်ပန်းခြံေ...
ဗိုလ်ချုပ်ကြေးရုပ် ဖွင့်ပွဲကို ပဒါန်းမြို့၌ ဖေဖော်ဝါရီ ၁၃ ရက်တွင် ကျင်းပမည်

မကွေး

မကွေးတိုင်းဒေသကြီး မင်းဘူးခရိုင် ပဒါန်းမြို့၌ အများပြည်သူ စုပေါင်းအလှူငွေများဖြင့် သွန်းလုပ်ထားသည့် ဗိုလ်ချုပ်ကြေးရုပ်ကို ပဒါန်းမြို့လယ်ပန်းခြံရှေ့တွင် ဇန်နဝါရီ ၄ ရက်က ထားရှိပြီး ဖွင့်ပွဲကို ဖေဖော်ဝါရီ ၁၃ ရက်တွင် ကျင်းပမည်ဖြစ်ကြောင်း ဗိုလ်ချုပ်ကြေးရုပ်ဖြစ်မြောက်ရေးကော်မတီဥက္ကဋ္ဌ ဦးကျော်ရွှေထံမှ သိရသည်။


ဗိုလ်ချုပ်ကြေးရုပ်ကို ရန်ကုန်မြို့တွင် သွန်းလုပ်ခဲ့ပြီး ၂ဝ၁၆ ခုနှစ် မေလက စတင်သွန်းလုပ်ခဲ့ကာ ဗိုလ်ချုပ်ကြေးရုပ် အလေးချိန်မှာ ကြေးပိဿာ ၃ဝဝ ရှိပြီး အမြင့်ကိုးပေရှိ ကြောင်းသိရသည်။ ဗိုလ်ချုပ်ကြေးရုပ် သွန်း လုပ်ရန် လုပ်ငန်းရှင်များနှင့် ပြည်သူများက အလှူငွေများ ထည့်ဝင်ကြသည်။ ထို့ပြင် ဗိုလ်ချုပ်ကြေးရုပ်ဖြစ် မြောက်ရေးကော်မတီက ရန်ပုံငွေရှာဖွေရန် မင်း ဘူး(စကု)၊ ငဖဲ၊ မင်းလှမြို့နယ်များမှ ဘောလုံး အသင်း ၃၁ သင်းကို ဖိတ်ခေါ်ပြီး ဘောလုံးပြိုင်ပွဲများ ပြုလုပ်ပေးခဲ့ကြောင်း ဖြစ်မြောက်ရေး ကော်မတီဥက္ကဋ္ဌ ဦးကျော်ရွှေကရှင်းပြသည်။ ဗိုလ်ချုပ်ကြေးရုပ် သယ်ဆောင်လာစဉ်က အမြို့မြို့အနယ်နယ်မှ ပြည်သူများသည် လှိုက်လှဲစွာ ကြိုဆိုဦးညွှတ်အလေးပြုကြသည်။ ဗိုလ်ချုပ်ကြေးရုပ်ကို ပဒါန်းမြို့လယ်ပန်းခြံရှေ့ ၌ထားရှိပြီး ကြေးရုပ်ဖွင့်ပွဲကို ဖေဖော်ဝါရီ ၁၃ ရက် ဗိုလ်ချုပ်မွေးနေ့တွင် စည်ကားစွာ ကျင်းပသွားမည်ဖြစ်ကြောင်း သိရသည်။

 

မကွေးလှမြင့်

#theyangontimes