“ဖြစ်သင့် ဖြစ်ထိုက်တဲ့ ဈေးနှုန်းများ မဖြစ်ဘူးဆိုရင်တော့ ကျွန်တော်တို့ ဝန်ကြီးဌာနအနေနဲ့ Price(ဈေးနှုန်း)ကို Freeze(ကန့်သတ်မှု)လုပ်မှာ ဖြစ်ပါတယ်” ဟု ဦးသန့်စင်က ပြောကြားသည်။

 မြန်မာ့ရေနံထွက်ပစ္စည်းရောင်းဝယ်ရေးလုပ်ငန်းမှ ဦးဆောင်ညွှန်ကြားရေးမှူး ဦးသန့်စင်က သတင်းထုတ်ပြန်ပွဲတွင် ရှင်းလင်းပြောကြားနေစဉ်(ဓာတ်ပုံ- မင်းမင်း/မဇ္ဈိမ)

နေပြည်တော်(အောက်တိုဘာ ၁၁ရက်၊ ၂၀၁၈ခုနှစ်)။        ။ စံချိန်တင် မြင့်တက်နေသည့် ပြည်တွင်းစက်သုံးဆီအား ဖြစ်သင့်ဖြစ်ထိုက်သည့် ဈေးနှုန်းထက် ကျော်လွန်ပြီး မတော်လောဘဖြင့် ရောင်းချပါက ဈေးနှုန်းကန့်သတ်မှုများ လုပ်ဆောင်သွားမည်ဟု မြန်မာ့ရေနံထွက်ပစ္စည်းရောင်းဝယ်ရေးလုပ်ငန်းမှ ဦးဆောင်ညွှန်ကြားရေးမှူး ဦးသန့်စင်က ပြောသည်။

“ဖြစ်သင့် ဖြစ်ထိုက်တဲ့ ဈေးနှုန်းများ မဖြစ်ဘူးဆိုရင်တော့ ကျွန်တော်တို့ ဝန်ကြီးဌာနအနေနဲ့ Price(ဈေးနှုန်း)ကို Freeze(ကန့်သတ်မှု)လုပ်မှာ ဖြစ်ပါတယ်” ဟု ဦးသန့်စင်က ပြောကြားသည်။

နေပြည်တော်ရှိ လျှပ်စစ်နှင့်စွမ်းအင်ဝန်ကြီးဌာနတွင် အောက်တိုဘာ ၁၁ရက်က ပြုလုပ်သည့် သတင်းထုတ်ပြန် ပွဲတွင် စက်သုံးဆီဈေးနှုန်းနှင့်ပတ်သက်ပြီး ရှင်းလင်း ပြောကြားခဲ့ခြင်း ဖြစ်သည်။

လက်ရှိအခြေအနေတွင် ပြည်တွင်းလုပ်ငန်းရှင်များ၏ စက်သုံးဆီ တင်သွင်း၊ ဖြန့်ဖြူး၊ ရောင်းချမှုသည် ပြိုင်ဆိုင်မှု ပြင်းထန်နေကြောင်း၊ လတ်တလောတွင် ဈေးကွက်စီးပွားရေးစနစ်နှင့်အညီ လွတ်လပ်စွာ ဖြန့်ဖြူးရောင်းချခွင့် ပြုကာ စောင့်ကြည့်နေသော်လည်း လိုအပ်ပါက ဈေးနှုန်းကန့်သတ်မှု ပြုလုပ်မည်ဟု ဦးသန့်စင်က ဆိုသည်။

“ဟို…သွားပြီးတော့ မင်းဒီဈေးထက် ပိုပြီးတော့ မရောင်းရဘူးလို့တော့ ကျွန်တော်တို့ ဒီလိုတော့ ကန့်သတ် လို့တော့ မရသေးပါဘူး။ ကျွန်တော်တို့ လိုအပ်ရင်တော့ ဆောင်ရွက်ရမှာ ဖြစ်ပါတယ်” ဟု ၎င်းက ဆက်လက် ပြောကြားသည်။

စက်သုံးဆီ ဈေးနှုန်များ ကန့်သတ်မှုကို ပြီးခဲ့သည့်နှစ် ဒီဇင်ဘာလနှင့် သင်္ကြန်ကာလတွင် ဈေးနှုန်းကန့်သတ်မှု နှစ်ကြိမ် ပြုလုပ်ခဲ့ရဖူးကြောင်း အဆိုပါပွဲမှ သိရသည်။

ပြည်တွင်း၌ သုံးစွဲနေသည့် စက်သုံးဆီများကို စင်္ကာပူနိုင်ငံမှ အဓိက ဝယ်ယူတင်သွင်းဖြန့်ဖြူးလျက် ရှိရာ စင်္ကာပူဈေးနှုန်းနှင့် နိုင်ငံခြားငွေလဲလှယ်နှုန်းတို့အပေါ် မူတည်၍ ပြည်တွင်း စက်သုံးဆီဈေးနှုန်း အတက်အကျ ပြောင်းလဲမှု ဖြစ်ပေါ်လျက် ရှိသည်ဟုလည်း လျှပ်စစ်နှင့်စွမ်းအင်ဝန်ကြီးဌာနက သတင်းထုတ်ပြန်ထားသည်။

စက်သုံးဆီကို ပြည်ပကုမ္ပဏီများအား လွန်ခဲ့သည့် တစ်နှစ်ကျော်ကတည်းက လာရောက်ရင်းနှီးမြှုပ်နှံရန် ခွင့်ပြုထားသော်လည်း လက်ရှိအချိန်အထိ လာရောက်လုပ်ကိုင်ခြင်း မရှိသေးဘဲ “လေ့လာနေဆဲ” ဟုသာ အကြောင်းပြန်ကြားသည်ဟု ဦးသန့်စင်က ဆိုသည်။

စက်သုံးဆီ တင်သွင်းဖြန့်ဖြူးခြင်းကို ယခင်က အစိုးရကသာ ဆောင်ရွက်ခဲ့သော်လည်း သမ္မတဦးသိန်းစိန် အစိုးရလက်ထက် ၂၀၁၁ခုနှစ် နောက်ပိုင်းတွင် ပြည်တွင်းရှိ ပုဂ္ဂလိကလုပ်ငန်းရှင်များကို လုပ်ကိုင်ခွင့်များ ပေးခဲ့ခြင်း ဖြစ်သည်။

ယမန်နှစ်က 92 Ron တစ်စည်လျှင် ကန်ဒေါ်လာ ၇၀ခန့် ဖြစ်ခဲ့သော်လည်း ယခုနှစ်တွင် ကန်ဒေါ်လာ ၉၀အထိ မြင့်တက်လာသလို ဒီဇယ်ဆီမှာလည်း ယမန်နှစ်က တစ်စည်လျှင် ကန်ဒေါ်လာ ၇၀ခန့်မှ ယခုနှစ်တွင် ကန် ဒေါ်လာ ၉၀မှ ၁၀၀ကျော်အထိ မြင့်တက်ခဲ့သည်။ထိုသို့ မြင့်တက်လာမှုများနှင့်အတူ ပြည်တွင်းရှိ စက်သုံးဆီ ဈေးနှုန်းများမှာလည်း မြင့်တက်လျှက်ရှိသည်။