အလုပ်ထုတ်ခံထားရသူ ၂၀၃ ဦးရှိနေပြီး ၎င်းတို့၏ စားဝတ်နေရေးမှာလည်း ခက်ခဲလျှက်ရှိနေခြင်းကြောင့် အလုပ် ပြန်လည်ခန့်အပ်ပေးရန် အလုပ်ထုတ်ခံထားရသည့် ဝန်ထမ်းများကဆိုသည်။

မန္တလေး၊ စက်တင်ဘာ ၁၄ ။            ။ မန္တလေးတိုင်းဒေသကြီး၊ စဥ့်ကိုင်မြို့နယ်၊ အမှတ်(၂)ပလိပ် ချည်မျှင်နှင့်အချောထည်စက်ရုံမှ လွှဲပြောင်းခံ နိုင်ငံ့ဝန်ထမ်းများ စက်တင်ဘာလ ၁၄ ရက်၊ မွန်းလွဲပိုင်းက တိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာ ဇော်မြင့်မောင်နှင့် တွေ့ဆုံရန်အတွက် အစိုးရအဖွဲ့ရုံးရှေ့မှာ ရောက်ရှိလျှက်ရှိသည်။

ယခင် စက်မှုဝန်ကြီးဌာနပိုင် အမှတ်(၂)ပလိပ် ချည်မျှင်နှင့်အချောထည်စက်ရုံကို ၂၀၁၃ ခုနှစ်မှစတင်၍ ပန်ဒါကုမ္ပဏီက နိုင်ငံ့ဝန်ထမ်းများပါ လွှဲပြောင်းရယူခဲ့ပြီး ယခုအခါတွင် ၎င်းနိုင်ငံ့ဝန်ထမ်းများကို အလုပ်ရှင်၊ အလုပ်သမား စာချုပ် မချုပ်ဆိုခဲ့ခြင်း ကြောင့်ဟုဆိုကာ အလုပ်ထုတ်ခဲ့သည့်အတွက် အလုပ် ပြန်လည်ခန့်ထားပေးရန် အစိုးရအဖွဲ့မှ ညှိုနှိုင်း ဆောင်ရွက်ပေးစေလိုခြင်းကြောင့် ယခုလို ဝန်ကြီးချုပ်နှင့် လာရောက်တွေ့ဆုံရခြင်းဖြစ်သည်ဟု အလွှဲပြောင်းခံ နိုင်ငံဝန်ထမ်း စက်ရုံစိတ်မှူး ဒေါ်ဇာဇာလတ်က ဆိုသည်။

ဒေါ်ဇာဇာလတ်က "လွှဲပြောင်းခံ နိုင်ငံ့ဝန်ထမ်းတွေကို ဥပဒေမဲ့ အလုပ်ထုတ်ပစ်တာ။ အလုပ်မှာ စည်းကမ်း ဖောက်ဖျက်လို့ ခိုးလို့ ဝှက်လို့ ဘာတစ်ခုမှ မဟုတ်ဘူး။ ဒီအတိုင်း အလုပ်ရှင်က အလုပ်သမားတွေကို သူတို့ တစ်ဖက်သတ် ရေးဆွဲထားတဲ့EC စာချုပ် မချုပ်လို့ဆိုပြီး အလုပ်ထုတ်ပစ်တာ။"ဟု ပြောသည်။

အလုပ်ထုတ်ခံထားရသူ ၂၀၃ ဦးရှိနေပြီး ၎င်းတို့၏ စားဝတ်နေရေးမှာလည်း ခက်ခဲလျှက်ရှိနေခြင်းကြောင့် အလုပ် ပြန်လည်ခန့်အပ်ပေးရန် အလုပ်ထုတ်ခံထားရသည့် ဝန်ထမ်းများကဆိုသည်။

အလုပ်ပြန်လည်ခန့်ပေးနိုင်ရေးအတွက် ဝန်ကြီးချုပ်က ညှိုနှိုင်းဖြေရှင်းပေးနိုင်လိမ့်မည်ဟုလည်း အလုပ် ထုတ်ခံထားရသူများက မျှော်လင့်နေကြောင်းသိရသည်။

ပြီးခဲ့သည့် ဇူလိုင်လ ၂၉ ရက်က မန္တလေးတိုင်းဒေသကြီး စဥ့်ကိုင်မြို့နယ်၊ ပလိပ်မြို့ ပန်ဒါချည်မျှင်အထည်နဲ့ အချောကိုင်စက်ရုံမှ အလုပ်ခန့်ထားမှု ဆိုင်ရာ သဘောတူညီချက်စာချုပ်ကို ဇူလိုင်လကုန် နောက်ဆုံးထား ချုပ်ဆိုရန်နှင့်သတ်မှတ်ရက်အတွင်း စာချုပ်ချုပ်ဆိုခြင်း မရှိသော အလုပ်သမားများကို အလုပ်ကနေ ထုတ်ပယ်မယ်ဆိုတဲ့ အလုပ်ရှင်ဘက်မှ ကြေညာထားခဲ့မှုအပေါ် စက်ရုံဝန်ထမ်းများက ဆန္ဒပြခဲ့ကြသေးသည်။