ပညာရေးကောလိပ်ကျောင်းသားများအနေဖြင့် ပညာဆက်လက်သင်ကြားခွင့်အနေဖြင့် ပညာရေးတက္ကသိုလ်များတွင်သာ ဖြစ်သင့်သည်ဟု ဆန္ဒပြကျောင်းသားတစ်ဦးက ဆိုသည်။

ပခုက္ကူ၊စက်တင်ဘာ ၁၄ ။         ။ ပညာရေးတက္ကသိုလ်များတွင် ပညာဆက်လက်သင်ကြားခွင့်ရှိရေးအတွက် ပခုက္ကူပညာရေးကောလိပ်ကျောင်း သားသမဂ္ဂမှ ဦးဆောင်ကာ ပခုက္ကူပညာရေးကောလိပ် ကျောင်းသား၊ကျောင်းသူများက စက်တင်ဘာလ ၁၄ရက်နေ့က လှည့်လည်ဆန္ဒပြခဲ့ကြသည်။

ပညာရေးကောလိပ်ကျောင်းသားများအနေဖြင့် ပညာဆက်လက်သင်ကြားခွင့်အနေဖြင့် ပညာရေးတက္ကသိုလ်များတွင်သာ ဖြစ်သင့်သည်ဟု ဆန္ဒပြကျောင်းသားတစ်ဦးက ဆိုသည်။

" ကျွန်တော်တို့ ပညာရေးကောလိပ် ပညာဆက်လက်သင်တာသည် ဝိဇ္ဇာ၊သိပ္ပံဘက်က အဝေးသင်မှာ မဖြစ်သင့် ဘူး။ ပညာရေးတက္ကသိုလ်မှာသာဖြစ်သင့်တယ်။ ပညာရေးတက္ကသိုလ်ကို ပညာရေးကောလိပ်က ၂ နှစ် ဆင်း တဲ့လူတွေက B.Ed ပါင်းကူး Grade point မှီတဲ့သူတွေက တက်ရတယ်။ Grade point မှီတဲ့သူက ၁၀ရာခိုင်နှုန်းလောက်ပဲပါတယ်။"ဟု ဆန္ဒပြကျောင်းသား ကိုအောင်ဇော်ဝင်းက ဆိုသည်။

ယင်းဖြစ်စဉ်များကြောင့် ပညာရေးကောလိပ်မှ ဝိဇ္ဇာ၊ သိပ္ပံ အဝေးသင်တက္ကသိုလ်တွင် သွားရောက်ပညာသင်ကြားရသူများနေပြီး နစ်နာသူ ၉၀ ရာနှုန်း လောက် ရှိနေသည်ဟု ကိုအောင်ဇော်ဝင်းက ပြောသည်။ ပညာရေးကောလိပ်များတွင် ဝင်ခွင့်စတင်ခေါ်ယူစဉ်က တက္ကသိုလ်ဝင်တန်းအောင် အမှတ် ၄၀၀ကျော်ဖြင့် မူလတန်းဆရာ အတတ်သင်ဟုသာ ခေါ်ယူခဲ့ပြီး သင်တန်းပြီးဆုံးသည့်အချိန်တွင် အလယ်တန်းပြသင်တန်းဆင်းခဲ့သော်လည်း မူလတန်းပြတာဝန်များသာ ထမ်းဆောင်နေရသည်ဟု သိရသည်။

 

"ကျွန်တော်တို့ ပညာရေးကောလိပ်ကို အမှတ် ၄၀၀ ကျော်နဲ့ မြို့နယ်အလိုက်ခွဲတမ်းနဲ့ဝင်ခဲ့ရတယ်။ ပထမနှစ်မှာ မူလတန်းသင်ရိုးသင်ခဲ့ရတယ်။ဒုတိယနှစ်မှာ အလယ်တန်းပြ သင်ရိုးသင်ပြီးတော့ အလယ်တန်းပြအောင်လက်မှတ်နဲ့ မူလတန်းဆင်းရတယ်"ဟု ဆန္ဒပြ ကျောင်းသား ကိုအောင်ဇော်ဝင်းက ပြောသည်။

ပညာရေးကောလိပ်ကျောင်းသားများအနေဖြင့် ပညာရေးကောလိပ်မှ သင်တန်းဆင်းပြီး မူလတန်းပြ တစ်နှစ်ပြည့်လျှင် အလယ်တန်းပြအဆင့် ၊ အလယ်တန်းပြ ၃နှစ်ပြည့်လျှင် ပညာရေးတက္ကသိုလ် အထက်တန်းပြ ဝင်ခွင့် ရရှိရေးများကို ပညာရေးဝန်ကြီးဌာနထံသို့ တောင်းဆိုထားသည်။

ပညာရေးကောလိပ် ထွက်ဆရာ၊ဆရာမ များအနေဖြင့် အလယ်တန်းပြရာထူးတိုးရန် အဝေးသင်တက္ကသိုလ်မှ ဘွဲ့ရရှိမှ ရာထူးတိုးဖြေဆိုခွင့်ရှိသည်ဟု သိရသည်။

လက်ရှိတွင် မြန်မာနိုင်ငံအနှံ့မှ ပညာရေးကောလိပ် ကျောင်းပေါင်း ၁၄ ကျောင်းမှ ကော်မတီဖွဲ့ပြီး အဆိုပါ ကိစ္စရပ်ကို ဆန္ဒပြတောင်းဆိုမှုများရှိနေသော်လည်း ပညာရေးဝန်ကြီးဌာနမှ မည်သည့်အချက်မျှ လုပ်ဆောင် ပေးခြင်းမရှိသေးပေ။