ရုရှား နိုင်ငံတကာ စစ်ရေးစွမ်းရည်ပြိုင်ပွဲဝင် မြန်မာစစ်ဆေးတပ်ဖွဲ့ အဆင့် ( ၆ ) နေရာရရှိ
ရုရှားနိုင်ငံမှာ ကျင်းပနေတဲ့ နိုင်ငံတကာ စစ်ရေးစွမ်းရည်ပြိုင်ပွဲ International Army Games-2018 မှာ မြန်မာ့တပ်မတော် ဆေးတပ်ဖွဲ့က နိုင်ငံအလိုက်အဆင့် ၆ နေရာရှိခဲ့တယ်လို့ တပ်မတော်က သတင်းထုတ်ပါတယ်။

ဇူလိုင် ၂၈ ရက်မှ သြဂုတ် ၁၁ ရက်အထိ ကျင်းပတဲ့ ဒီပြိုင်ပွဲသို့ မြန်မာ့တပ်မတော်က တင့်တပ်ဖွဲ့၊ ဆေးတပ်ဖွဲ့နဲ့ လက်ဖြောင့်သေနတ်ပစ်တပ်ဖွဲ့အပြင် ယဉ်ကျေးမှုအဖွဲ့ကလည်း ပါဝင်ယှဉ်ပြိုင်နေတာပါ။

ပြိုင်ပွဲမှာ မြန်မာ့တပ်မတော် ဆေးတပ်ဖွဲ့က ပြိုင်ပွဲအမျိုးအစား ၁၀ မျိုးမှာ ဆေးမှူး၊ သူနာပြုနဲ့ ယာဉ်မောင်းအဖွဲ့ဝင် ၁၇ ဦးတို့ ဝင်ရောက်ယှဉ်ပြိုင်ခဲ့ရာမှာ ပြိုင်ပွဲဝင်နိုင်ငံ ၉ နိုင်ငံ၊ ပြိုင်ပွဲဝင်အသင်း ၁၀ သင်းအနက် နိုင်ငံအလိုက်အဆင့် ၆ နေရာ ရပ်တည်နိုင်ခဲ့ပါတယ်။

ဆေးမှူးအမျိုးသား၊ အမျိုးသမီး အရေးပေါ်ဆေးရုံပြိုင်ပွဲမှာ အမျိုးသားဆေးမှူး ဗိုလ်မင်းမြင့်ကျော်ဇောက နိုင်ငံအလိုက်အဆင့် ၄ နေရာနဲ့ အမျိုးသမီးဆေးမှူး ဗိုလ်ဖွေမွန်မျိုးက အဆင့် ၅ နေရာမှာ ရပ်တည်ခဲ့တယ်လို့ တပ်မတော်သတင်းအရ သိရပါတယ်။

မြန်မာ့တပ်မတော်တင့်တပ်ဖွဲ့ကတော့ Tank Biathlon တင့်ကားမောင်းနှင်ပစ်ခတ် ပြိုင်ပွဲသို့ အဖွဲ့ဝင် ၂၁ ဦးနဲ့ ၀င်ပြိုင်ခဲ့ကာ နိုင်ငံ ၂၂ နိုင်ငံ အနက် အဆင့် ၁၆ နေရာ ရခဲ့ပါတယ်။

မြန်မာ့တပ်မတော် လက်ဖြောင့်သေနတ်ပစ် တပ်ဖွဲ့ကတော့ အဖွဲ့ဝင် ၉ ဦး ဝင်ရောက် ယှဉ်ပြိုင်ခဲ့ရာ နိုင်ငံ ၁၈ နိုင်ငံအနက် အဆင့် ၁၁ နေရာ ရပါတယ်။

ဒီပြိုင်ပွဲနဲ့ ဆက်စပ်ပြိုင်ပွဲဖြစ်တဲ့ Creative Competition ပြိုင်ပွဲဝင် မြန်မာ့တပ်မတော် ယဉ်ကျေးမှုအဖွဲ့ကတော့ ‘သက်ဝေ’ သီချင်းကို မြန်မာ့တူရိယာစောင်းနဲ့ သီဆိုတီးခတ်တာ၊ ဦးရွှေရိုးအက၊ နှစ်ပါးသွားအက စတာတွေနဲ့ ဝင်ပြိုင်နေပြီး ပွဲစဉ် (၁) ယှဉ်ပြိုင်အပြီး နိုင်ငံအလိုက် အဆင့် ၂ နေရာ ရပ်တည်နေပါတယ်။

အခုနှစ် နိုင်ငံတကာ စစ်ရေးစွမ်းရည်ပြိုင်ပွဲမှာ နိုင်ငံပေါင်း ၃၃ နိုင်ငံက ပြိုင်ပွဲအမျိုးအစား ၂၈ မျိုးကို ရုရှား၊ တရုတ်၊ အဇာဘိုင်ဂျန်၊ အာမေးနီးယား၊ ဘီလာရုစ်၊ အီရန်၊ ကာဇက်စတန်နိုင်ငံတွေမှာ နေရာခွဲ ကျင်းပနေတာဖြစ်ပြီး မြန်မာအနေနဲ့ ပထမဆုံးအကြိမ် ဝင်ပြိုင်တာ ဖြစ်ပါတယ်။

ဓာတ်ပုံ-CINCDS
ဖိုးသူတော် (www.phothutaw.com)
Credit: BurmeseAsia